تامر حبيب: لما أموت شغلوا الأغاني اللي بحبها وارقصوا
كشف السيناريست تامر حبيب سبب حضوره حفل زفاف في الجونة وتخليه عن حضوره عزاء الفنان الراحل سمير غانم، وقال إن الراحل ربما كان يفعل ذلك لو كان الأمر العكس.
وأضاف خلال لقائه في البرنامج التلفزيوني "حبر سري" مع الإعلامية أسما إبراهيم على قناة القاهرة والناس: "الله يرحم سمير غانم لو كان العكس كان ممكناً يعمل كده وكان يموت في البهجة، وأنا كنت في فرح في الجونة وللأسف الشديد كنت أحضر الصبح الجنازة وأرجع على الفرح بالليل".
طلب غريب من تامر حبيب لأصدقائه في عزاه
بينما طلب حبيب خلال البرنامج أن تقام حفل كبير في جنازته ويشغل فيها الموسيقى وأضاف: "كتبت وأكرر كلامي يوماً لما أموت اللي بيحبوني كلهم يعملون حفلة كبيرة على سيرتي ويشغلوا الأغاني اللي بحبها ويرقصوا ويتبسطوا ويكون أكتر واحد مبسوط في الدنيا".
وتابع حبيب قائلاً: "فكرة أني رحت الفرح مش معناه أني لم اتوجع على فراق سمير غانم وكان في علاقة بينا علاقة حب شديدة وكان صديقي ونلت شرف أني أشتغل معاه في شربات لوز، وأنا عارف أنه مش مضايق وأي حد تاني يولع وأولاده مش زعلانين".
وتحدث السيناريست المصري عن وفاة والدته وأكد أنه حتى الآن لم يستوعب وفاتها حتى بعد مرور خمس سنوات وقال: "مش عارف أعبر عن إحساسي وحتى الآن تأتي لحظة أنسى أنها توفيت وأول مرة أنسى ذكرى وفاة أمي كان السنة دي وكنت مرتاحاً شوية لأني قلت إني محتاج الحياة تمشي".
وأشار أن أول مكالمة بينه وبين والدته قبل وفاتها كان وقت سفره وروى تفاصيل تلك المكالمة وقال: "كانت أمي على طول توصيني لما أسافر أولاً لما أوصل اطمنها عليا وكنت بنسي على طول اول لما سافر، وكلمتني مرة واثنين وبعدين قلت لها أنا في بيت حلو قوي وفي جنينة حلوة قوى فقالت لي يا رب من بيت حلو لبيت أحلى ومن جنينة حلوة لجنينة أحلى ومن جو حلو لأحلى ولما توفيت أيقنت أنها كانت بتقولي رايحة فين".
تامر حبيب أزمة منة شلبي من أسود أيام حياتي
وتحدث تامر حبيب عن أزمة الفنانة منة شلبي خلال استضافته ببرنامج "حبر سري"، وقال: من أسود الأيام اللي مرت عليا وكنت قاعد هموت و روحتلها البيت ويومها عرفت قد إيه أنا بحبها وختها في حضني وكان همي إنها تضحك وتنبسط وأعمل أراجوز عشان تضحك، وكان في قسوة من البشر.
وأضاف: الناس كانت بتحكم على منة شلبي والضغط عليها جه من السوشيال ورد فعلهم عليها كأنهم أبو العريف ونازلين معاها من الطيارة.
تامر حبيب أنا بحب مدام إيناس الدغيدي
وسألت الإعلامية أسما إبراهيم، تامر حبيب، عن رده على تصريحات المخرجة إيناس الدغيدي بشأن التشكيك في رجولته، ليرد: "اللي قالته مدام إيناس مفيهوش تشكيك في كده خالص".
وتابع: أنا بحب مدام إيناس الدغيدي على المستوى الفني والشخصي، واللي قالته حصل له لعب في المونتاج، وتصريحاتها كانت رداً على كلام قيل في هذا الأمر، ولكن ليس رأيها الشخصي، موضحاً أن علاقته بالمخرجة لم تتأثر بهذا الموقف.
واستكمل حديثه: شكراً إن الموقف ده حصل، عشان لقيت الحب من كم البشر ده كله، ووقفوا معايا ومقبلوش الكلام والآراء التي اتكتبت وأنا مقرتهاش وضيعوا وقتهم على الفاضي.
