لا تأمن جماهير الأهلي.. شوبير لـ كهربا: "بتعمل مشكلة ليه دلوقتي؟"

وجه الإعلامي أحمد شوبير، رسالة تحذير إلى محمود عبد المنعم "كهربا" مهاجم النادي الأهلي، بعد أزمته الأخيرة ورفضه المشاركة في مران البدلاء عقب مباراة فاركو في الدوري.

شوبير لـ كهربا لا تأمن جماهير الأهلي

وقال أحمد شوبير: "كهربا بعد مباراة فاركو عمل مشكلة كبيرة الراجل كولر عمل تدريب بعد نهاية المباراة للاعبين اللي مشاركوش سأل فين كهربا قالوا له بيقول رجلي حاسس بتقل فيها، فكولر قال يعني هو كان احتياطي لو كان نزل لعب كان هيلعب ولا هيقول رجلي تقيلة، وفيه لائحة هيتم تطبيقها على كهربا وهيتعاقب".

وتابع شوبير: "أنا هنا عايز أقول لكهربا بالتحديد يا عم كهربا كلنا بنقرا إن أنتوا كفريق هتكرموا موديست عشان خلاص ماشي ومفيش غير حضرتك ووسام أبوعلي يعني 2 بس وساعات بيستعمل طاهر محمد طاهر وبيرسي تاو في رأس الحربة، فالراجل موديست ماشي فبتعمل مشكلة ليه دلوقتي يا كهربا".

وأوضح شوبير: "وسام أبتعلى بيتصاب أكتر من مرة وعرضة للإصابة والناس بتحبك وبتقف جنبك بس لو أنت موقفتش جنب نفسك يبقى كل سنة وانت طيب الناس هتدافع عنك مرة واتنين وتلاتة والاهلاوية واقفين جنبك وجنب إمام عاشور بس لأ اوعى تأمن جمهور الأهلي يطلعك السما وبعدها ممكن يخسف بيك الأرض هو عنده الأهلي والنادي رقم واحد".

وأضاف شوبير: "أنا عجبني جدا أفشة كان نجم المباراة قدام الداخلية وقدام فاركو الراجل ملعبوش خلاص عادي معملش مشكلة ولا عمل حاجة، فده النظام واللي مش عاجبه هو حر".

مغادرة كهربا بدون إذن

وكان مارسيل كولر المدير الفني للنادي الأهلي قد طلب تنظيم فترة تدريبية للاعبين المستبعدين من مباراة الفريق مع نادى فاركو وبالفعل انتظم اللاعبون في المران إلا أن اللاعب محمود عبد المنعم كهربا غادر المران ولم يقم بإبلاغ الجهاز الفني بالأمر واكتفى فقط بإبلاغ زملاؤه أنه يشعر بإجهاد عضلي.

وآثار هذا الأمر غضب مارسيل كولر الذى طالب بفتح تحقيق عاجل لكهربا لتعرف ما إذا كان اللاعب يعانى من إصابة فعلية أم أنه غادر المران اعتراضًا على عدم مشاركته أساسيًا في المباراة مع نادي فاركو.