الرئيس السيسى:" لولا أحداث 2011 ما كانش سد النهضة أتبنى"
شدد الرئيس عبد الفتاح السيسى، على أنه لولا أحداث 2011 لما كان لسد النهضة أن يكون، مضيفًا:"سد النهضة اتبنى بعد أحداث 2011 ولولا هذه الأحداث ما كانش اتبنى".
جاء ذلك خلال جلسة"المشروعات القومية والبنية التحتية"، فعاليات اليوم الثانى من مؤتمر "حكاية وطن.. بين الرؤية والإنجاز"، المنعقد بالعاصمة الإدارية الجديدة.
قال الرئيس عبد الفتاح السيسي، خلال كلمته بمؤتمر حكاية وطن، إن الرقم الذى طرح من رئيس الوزراء 10 تريليونات جنيه على الأسعار الحالية، 300 مليار دولار على الأسعار قبل كده 600 مليار دولار.
وأضاف الرئيس السيسي: من سنة ونصف كان في كأس العالم في قطر والإعلام هاجم انفاق 300 مليار دولار من دولة، الإعلام بيهاجم وبيقول ضيعتوا 300 مليار دولار، قولتلهم زعلانيين ليه ده الرقم اللى يتصرف على دولة إنها تجهز نفسها مش للكأس لكن علشان تبقى دولة تتقدم، ووقتها العلاقات لم تكن كما هي الآن لكن الوعى والفهم والصدق هو الأهم .
وتابع الرئيس السيسي: إحنا صرفنا 10 تريليونات فقط لأنها شركات مصرية لو أنها أجنبية كانت هتبقى 30 تريليونا لكن من كرم ربنا إنها بشركات مصرية بالكامل.
قال الرئيس عبد الفتاح السيسي، إنه تحدث مع مجلس القضاء الأعلى صباح اليوم عن سهولة هدم الدول، مبينا: "أنا كنت بكلم السادة مجلس القضاء الأعلى الصبح وقلتهم تخيلوا ممكن أهد مصر بـ2 مليار جنيه، وهما استغربوا جدا، قلتلهم أدي باكتة و20 جنيه وشريط ترامادول لـ100 ألف إنسان ظروفه صعبة، أنزله يعمل حالة".
أضاف الرئيس السيسي، خلال جلسة "المشروعات القومية والبنية التحتية " ضمن فعاليات مؤتمر "حكاية وطن.. بين الرؤية والإنجاز": "أهد بلد فيها 100 مليون أو 105 مليون بمليار جنيه، يعني 30 مليون دولار، فيه ناس بتصرفهم في حفلة! يبقى لما أجي أدفع 85 مليار للأسرة اللي هيا مش حاسة إنها عايشه والناس مرميه في الصفيح في الشوارع وفي المقابر، فحد يقولك البلد اللي مش لاقيه تاكل تفرشلهم الشقة كمان؟ طبعا، إذا كنا بنفهم كلنا يعني إيه أمن قومي مش هتستكتروا اللي إحنا بنعمله ده وأكتر منه.. إحنا تعبانين كده ومش معانا نعمل كده؟ أيوه، علشان مايبقاش عندك ثغرة يتم استخدامها في نظم الحرب الحديثة في هدم الدول".
وأكمل الرئيس السيسي: "ماحدش هيهاجمك كتير من بره بشكل مباشر لأن ده تبعاته ضخمة جدا ومكلفة جدا مش بس عسكريا وماليا حتى من منظور القانون الدولي والنظام العالمي الموجود، الناس نازله تتظاهر وأنا بمليار جنيه أنزلهم 10 أسابيع ورا بعض زي ما نزلوهم".
وجه الرئيس عبدالفتاح السيسي، خلال مؤتمر حكاية وطن بين الرؤية والإنجاز، الشكر للدكتور عاصم الجزار وزير الإسكان، والفريق كامل الوزير وزير النقل، على استعراض جهود وزارتيهما خلال الـ 9 سنوات الماضية، قائلا: "بشكركما طبعا".
أضاف الرئيس السيسي خلال مؤتمر حكاية وطن بين الرؤية والإنجاز،: "عاوز أقول إن كل كلمة قالها الدكتور عاصم والفريق كامل في كل نقطة اتعرضت أو ما اتعرضتش كان محل جهد وإرادة أن البلد دي تتغير من الواقع اللى موجودة فيه لواقع تاني خالص، واتصور أن كل وزير كان معني بشغله لكن دولة رئيس الوزراء كان موجود معانا، وأكثر شخصية تحملت ضغوط هائلة لأن الوزير المختص بيجي يعرض حاجته وخلاص، يكمل شغله، ويحضر اجتماع مجلس الوزراء، لكن الدكتور مصطفى كل يوم معانا ومش بجامل حد أبدا.. واوعوا تفتكروا الفترة لما كان فيها وزير الإسكان ورئيس الوزراء كانت فترة هينة.
