رحاب الجمل لـ ياسمين عز: لما أقول لجوزي يا أستاذ.. اسيب السكرتيرة تقوله يا بيبي
حلت الفنانة رحاب الجمل، ضيفة مع الإعلامية ياسمين عز،ببرنامَج "كلام الناس"، المذاع عبر فضائية "إم بي سي مصر"، مساء اليوم الأحد، للحديث عن تفاصيل حياتها الشخصية والفنية.
وعلقت رحاب الجمل على نصائح الإعلامية ياسمين عز للسيدات حول عدم مناداة الزوج باسمه والقول له أستاذ، قائلة: "لما أنا أقول لجوزي يا أستاذ في البيت..يروح بقى الشغل فـ السكرتيرة تقوله يا بيبي؟"، لترد عليها الأخيرة:" لا السكرتيرة تقوله يا بيه".
واسترسلت: لما اقول لجوزي سي الأستاذ بيبي دا ممكن يطفش ويهرب"، متابعة: انا بسمع نصايحك كلها وبعمل بيها مع جوزي.. وأي مشكلة في حياتي هجيبك".
ياسمين عز فى حلقة سابقة
ووجهت ياسمين، سؤالًا للسيدات حيث قالت: "ليه بتنادي على جوزك بدون ألقاب؟ يعني فين درس تفخيم الزوج اللي درسناه كلنا زمان فين؟ ليه نسينا الدرس ده؟ ليه نسينا الموضوع ده؟ فكروني نعمل حلقة بعنوان تفخيم الزوج.. نسيتيه أفكرك".
وأضافت: “ليه بتنادي على جوزك كده يا محمد حاف مثلًا؟ قولي لجوزك يا أستاذ محمد.. يا أستاذ محمد تحب تشرب إيه؟
اسمعي مني تكسبي.. لو جوزك اسمه محمد قوليله باللقب ده يا أستاذ محمد.. مفيش حاجة اسمها محماا لغوها خلاص.. ما تاكليش آخر حرف من اسم الراجل بعد إذنك.. زي ما انتي ما تقبليش إنه يأكل آخر حرف من اسمك انتي كمان ناديه باسمه كامل.. هل تقبلي مثلًا يكون اسمك سماح وينادي عليكي يقولك يا سماااا.
وتابعت: "هتبقى ليلتها مش فايتة وهترجعي تقولي بيخوني مع واحدة اسمها سما وهو مش قصده ما انتي بتقولي له محماااا وهو بيقولك سماااا.. انتي شيلتي الدال وهو شال الحاء.. يبقى انتي كمان ما تقوليش محماااا قولي أستاذ محمد.. هتنادي عليه إزاي كالآتي يا.. نطلع بياء النداء.. أستاذ.. للتفخيم.. محمد.. للتنعيم الشديد.. تاني هتقولي الجملة إزاي لما تنادي عليه عشان جوزك يحبك وحياتك تبقى سعيدة.. يا.. أداة نداء تطلعي بيها.. وتعلي بأستاذ.. أستاذ.. للتفخيم بين قوسين.. محمد.. للتنعيم".
واستكملت: "ممكن حد يسألني سؤال دلوقتي طب ليه بنقول يا.. ليه ما نقولش أيها الاتنين أدوات نداء خلي بالك.. لإن يا.. للقريب الحبيب.. أيها للبعيد الغريب نراجع نحو ما ترجعوش ورايا أنا عارفة بقول إيه.. فنقول يا لجوزك حبيبك القريب الحبيب.. أستاذ معروفة لقب للتفخيم.. محمد اسم علم تنعيم شتوي هادي".
