بالفيديو.. "الليثى" لوزير التموين: "فين السكر أبو 5 جنيه؟"
تعجب الاعلامي عمرو الليثي ببرنامجه " واحد من الناس" المذاع على قناة الحياة الاولى، قائلا: "اغرب من الخيال فرح في حوش مدرسة, الناس فوجئت بإن حوش مجمع مدارس العبيدية بمركز فارسكور بدمياط اتحول الي ساحة افراح بعد ما سمح مسئولي المدرسة باقامة سرادق فرح لمجاملة اصدقاء لهم بحوش المدرسة..هي كانت ناقصة كدا فعلا صحيح محافظ دمياط اوقف كل مسئولي المدرسة المسئولين عن المهزلة دي عن العمل بس انا مش قادر اتصور ازاي نوصل للمرحلة دي".
واضاف الليثى: "قالوا كيلو السكر وصل سعره لعشرة جنية الناس بتصرخ من الغلاء والسيد المحترم وزير التموين بيقولك لا دا بخمسة جنية بس فين يا سيادة الوزير يعني هي الناس هاتتبلي عليكم ولا هاتلاقي ابو خمسة وتروح تشتري ابو عشرة جنيه".
واشار الى ان وزير التربية والتعليم خرج يقول ان الوزارة جاهزة للعام الدراسي وانهم استعدوا باحسن الامكانيات، و"انا بقول له يا معالي الوزير الدكك مكسرة والابواب مخلعة والمدارس من غير سور والكتب لسه ما اتسلمتش لغاية دلوقتي".
وتابع: "كلاكيت تالت مرة مسئولي وزارة الزراعة رجعوا في كلامهم وقالوا ان قمح الارجوت طلع حلو ومفيش منه اضرار.. ما كان وحش.. وكان مضر.. وكان سام، اقول ايه حسبي الله ونعم والوكيل، ولا كله كوم و مشكلة الدولار كوم تاني، اقولكم ايه انا تعبت النهارده".
