قبل ساعات من نهاية استفتاء "الميدتيرم".. 92% يرفضون قرار الوزير.. قراء "العربية نيوز": يصب في مصلحة الدروس الخصوصية.. وآخرون لـ"الشربيني": "أولادنا مش فران تجارب"
ساعات قليلة، وينهي "العربية نيوز" استفتاءه حول تأييد أو رفض قرار المجلس الأعلى للتعليم قبل الجامعي لإلغاء امتحانات الفصل الدراسي الأول "الميدتيرم"، واستبدالها بـ6 اختبارات شهرية.
%92 رافض لقرار المجلس
ووصلت نسبة رفض القرار حتى 92% من إجمالي المشاركين في الاستفتاء، فيما توقفت نسبة المؤيدين للقرار عند الـ8% حتى الآن، فيما تباينت تعليقات قراء "العربية نيوز" حول طرق تعبيرهم عن أسباب رفضهم للقرار أو قبولهم.
يصب في صالح الدروس
وفي الأثناء قالت هدى دبور: "لا أوافق طبعا عشان ده عك الصراحة أي قرارات بدون دراسة وكأنهم بيعندوا مع الولاد وأهاليهم هو ده التطوير اللي طالبنا بيه حسبي الله ونعم الوكيل فيهم.. بدل ما يخففو المناهج ويطورها بجد بيزودو الأعباء على الأسرة والمدرسين اللي عندهم ضمير وعاوزين يخدوا وقتهم في شرح المناهج للطلبة والتيرم أصلا قصير.. وده طبعًا بيصب في كافة الدروس الخصوصية والمافيا اللي بتتحكم في الوزارة من اولها لآخرها".
"حرام.. كفاية عك"
فيما عبرت أم دنيا قائلة: "حرام عليكم كفاية كده اللعب بمستقبل ولادنا ده مش كره دول أطفال.. الأفضل تطوير المناهج التعليمية للأفضل وده مستحيل طبعًا في مصر أو يبقى امتحان الميترم بشرط اللي يمتحن فيه الطالب ما يذكرش فيه تاني في نصف السنة".
حذف حشو المناهج
وأضافت نرمين صلاح: "تطوير التعليم بيكون في تطوير طرق التدريس وحذف الحشو من المناهج وخلق مجال ابتكاري للطلاب وتحسين دخل ومستوى المدرس ومراعاة كثافة الفصل ومشكلات كتير ليس أحدهم عمل امتحانات شهرية بدل الميدتيرم ترهق الأم والطفل ولا تقدم أي جديد للعملية التعليمية".
الضغط العصبي للطلاب
فيما عبرت إيمان إبراهيم قائلة: "لا أوافق طبعا ده معناه أن احنا أطفالنا المساكين تفضل في ضغط عصبي ونفسي طول السنة علشان الولد أو البنت كل شوية عندهم امتحان حرام عليكم ارحموا طفولتهم وكفاية بقى قرارات عشوائية غير مدروسة".
وفي نفس السياق، قالت مريم أحمد: "لو كنتم عايزين يطلع أجيال كويسة عليكم تسهيل المناهج ووجود مساحة كافية في المدرسة للأنشطة علشان الطلاب يحبو المدرسة مش ينفروا منها وتأكد لما الطالب يحب يروح المدرسة مش يعيط ويقول مش عايز أروح أنت كده نجحت في أن تبقى من الدول المتقدمة في التعليم وشكرا".
ولادنا مش فران تجارب
ووجهت منى البدري رسالة لـ"الشربيني" قائلة: "كفاية تجارب أولادنا مش فران تجارب ومستقبلهم مش لعبة في إيد أي وزير.. قرارات عشوائية غير مدروسة، مطالب بسيطة مش صعبة اللي تم امتحانه في الميدتيرم لا يتم الامتحان فيه مرة أخرى في امتحانات التيرم حرصًا على وقت الطالب وتيسير سير العملية التعليمية حسب الخطة الزمنية".
وعلى النقيض وافقت أم منة على إلغاء امتحانات الفصل الدراسي الأول واستبدالها بـ6 اختبارات شهرية قائلة: "نعم على الأقل الأولاد حيرجعوا أول بأول".
