بالصور.. ماذا طلب الدجالون من محررة "العربية نيوز"؟.. تقمصت دور "المجروحة" لاستعادة حبيبها السابق من صديقتها "الخائنة" فماذا حدث بالكواليس؟.. "فلوس وإيحاءات جنسية ومفاجآت أخرى"
بعد انتشار ظاهرة النصب والدجل والشعوذة عن طريق المواقع الإلكترونية وصفحات التواصل الاجتماعي خاضت محررة "العربية نيوز" تجربة لمحاولة كشف تفاصيل "شيوخ الروحانيات على السوشيال ميديا" وتمكنت من التواصل مع دجال سوداني عن طريق صفحته على "فيس بوك" والتي تحمل اسم "أستاذ للروحانيات والعلاج" بحجة جلب الحبيب وطلب منها 300 دولار لعمل "عمل" لحبيبها السابق.
وتواصلت المحررة من خلال حساب مزيف تحت اسم "ميرفت مجدي" على "فيس بوك" مع أحد "الشيوخ" باعتبارها تريد منه أن يقوم "بجلب حبيبها" لها.
وجاء نص المحادثة التي أجرتها محررة "العربية نيوز" مع الدجال على صفحته بـ"فيس بوك" كالتالي:
محررة العربية "ميرفت مجدي": أنا عندي مشكلة ومحتاجة مساعدتك
الشيخ: شو في احكي
ميرفت: عايزة أعمل جلب للحبيب حبيبي سابني بعد 7 سنوات وخطب صديقتي
الشيخ: منين إنتى
ميرفت: مصر
الشيخ: تمام
ميرفت: إيه مطلوب
الشيخ: صورتك أولا وصورة الشخص
ميرفت: ينفع أعرف محتاج الصور في إيه لأني بقلق من موضوع الصور ده
الشيخ: لا مو تقلقي للكشف الآن.. تمام انتظري الكشف
محررة العربية: هترد امتى عليا
الشيخ: إنتي كان في بينكم علاقة حب
محررة العربية: أه
الشيخ: كتير وخروجات..هو ظهر إنه بيحبك وبعد هيك شخصة ذنت بإذنه فحبها ونسيكي
محررة العربية: طب وإيه الحل
الشيخ: الحل لما تأتي هتجيبي مصاريكي معك
محررة العربية: عايز كام
الشيخ: وهشتغل لك وإنتي وموجودة..100 دولار بمعدل 1200 جنيه مصري
محررة العربية: أوكى ماشي
الشيخ: اكتبي رقمك واسمك رباعي
الشيخ: بنت
محررة العربية: أيوه
الشيخ: تمام في جلب 300 دولار علوي وفي جلب سفلي 100 دولار
محررة العربية: إيه فرق بينهم
الشيخ: العلوى بالقرآن والسفلي كتابة على ظهر وبطن
محررة العربية: الأحسن يا شيخ اعملوا وقولي المطلوب
الشيخ: الاتنين كويسين
محررة العربية: اعمل السفلي
الشيخ: في ناس تقول السفلي لا
محررة العربية: السفلي وحش يعنى
الشيخ: لا السفلى فى 6 ساعات أو تلات تيام بيأتي الحبيب خاضع راكع.. أنا مكتبي في السيدة زينب شارع السد بجوار مسجد حبيبي تشرفو
ميرفت: مسجد إيه
الشيخ: مسجد الحبيبى بجوار مسجد السد على طول
كما تواصلت محررة العربية مع دجال آخر اسمه "أشرف الريان" تحت اسم مستعار "مروة" وطلبت منه عمل "عمل" لزوجها وصديقتها ووعدها بعمل "عمل لهما" وإذلالهما
وجاء نص المكالمة التليفونية كالتالي:
الشيخ: أيوه
محررة "العربية نيوز" "مروة": تلفوني بايظ معلش متأسفة جدًا
الشيخ: لا ولا يهمك
محررة "العربية": طيب دلوقتي أنا عندي 25 سنة وجوزي عرفت إن هو يعني بيخوني مع واحدة صحبتي
الشيخ: تمام
محررة العربية: فأنا مش هكتفي بأن انفصل عنه وكده بس عايزه أذله وأذلها وأول مرة ألجأ للحل بتاع الشيوخ وكده كل الناس بتقول إن الكلام ده مش حقيقي فأنا محتاجه مساعدة حضرتك لعل وعسى الأمر يتحل على إيديك
الشيخ: بإذن الله هتشوفي كل خير
محررة العربية: تمام ربنا يخليك في إيه مفروض إن هو يتعمل أو حضرتك عندك حل أو لا
الشيخ: إنتى عايزه إيه
محررة العربيه: أنا عايزه اعلمه الأدب هو وهي أذله أذلهم يعنى هي كانت بتاكل عيش وملح في بيتي وعرفت عن طريق الصدفة
الشيخ: عندك واتس
محررة العربيه: لا معنديش نت والله بس ممكن أقابلك ونشوف التكاليف وتقولي أعمل إيه ونشوف كل حاجة مفيش مشاكل
الشيخ: أنا موجود في أسيوط
محررة العربية: طب ما بتنزلش القاهرة
الشيخ: بالنسبة القاهره ما بنزلش بنسبة الشغل اللى معايا وكده
محررة العربية: طب إيه الحل أنا مش هعرف أجي أسيوط
الشيخ: خلاص يبقى تديني اسم الأم ليكي وليها
محررة العربية: نعم
الشيخ: تدينى الاسم
محررة العربية: الاسم بتاعى ولا اسم جوزي ولا صحبتي
الشيخ: اسمك واسم جوزك واسم صحبتك
محررة العربية: أنا اسمى مروة
الشيخ: وبعد كده أنا هقولك هنعمل إيه
محررة العربية: تمام معاك
الشيخ: وبعد كده بنيجي عاملين حاجه اسمها لو تعليم الأدب هنعمله "ربط"
محررة العربية: تمام وهي
الشيخ: وهي هنعملها أي شيء
محررة العربية: مش كده أنا عايزه أذيها بقولك كانت بتاكل عيش وملح في بيتي
الشيخ: طب الأذى مفيش أسهل منه نعملها "نزيف"
محررة العربية: ده قتل
الشيخ: لا نزيف
محررة العربية: نزييييف تمام طب في حلول تانيه ولا ده بس اللي ممكن يأذيها
الشيخ: اللي ‘نتي عيزاه في الأذى نعملهواك
محررة العربية: أنا أول مره ألجا الحل ده فانا مش عارفه إيه ممكن يحصل
الشيخ: هو أوسخ حاجه بعيد عنك اللي هو الأذى ده أوعر حاجة لآنها في الآخر هتضيع خالص
يا ما كده ياما هتحس ببطنها بتتشكشك وفي ظهرها ورجليها بس ده أذى عظمي يعنى هتروح تكشف مع الدكاترة وبس
لكن النزيف مهما تروح لأي دكتور ميعرفش يحل لها
محررة العربية: ميعرفش الحل يعني
الشيخ: ملهاش حل أصلا عند الدكاتره غير إنه هيديها برشام هتخف شوية وثاني يوم هينطر الدم تاني زى ما هو ده بالنسبة للأذى
محررة العربية: مظبوط تمام إيه تاني
الشيخ: منا بقولك هو ده أوسخ حاجه لكن شوفي إنتى عايزه إيه أذى تاني
محررة العربية: لا خلاص تمام ماشي إنت أدرى طبعًا أكيد أنا معاك في الحل ده وهو في حل تاني في حاجه أكتر من كده ممكن أذيه بيها
الشيخ: لا هو أنصحك متأذيهوش لأنه مهما كان جوزك وهيرجع لك
محررة العربية: ماشى ما هو هيرجع لى بس أنا هسيبه ده خاين بس لازم يتعلم لازم يتقرص من ودانه لازم يتعلم الأدب
الشيخ: لا لو عايزه تعلميه الأدب وعايزه تأذيه أذى جامد
محررة العربية: بقولك مراته ومستحملاه واحدة صحبتي بتاكل عيش وملح في بيتي
الشيخ: لو كنتى عايزه تأذيه هو والبت دي لو اتفقنا وحصل نصيب في حلين هقولك عليهم دولا بإذن الله بإذن الله هتيجى تبوسي فوق إيدي ورجلي وتقولي لو سمحت خف عنهم دي أول حاجة
محررة العربية: تمام
الشيخ: بالنسبة لى هو ولو عارفة نفسك خلاص مهترجعليهوش تاني في حاجه هقولك عليها تعمليها عندك في البيت بس تعاهديني بأمر الله انك متجبيش سيرة لأي حد عليها
محررة العربية: لا طبعا مينفعش
الشيخ: أنا هخدمك في الكلام ده بس دي مكلفة شوية
محررة العربيه: لا أنا تحت أمرك في أي فلوس مفيش أي مشكلة
الشيخ: لا ياستي أنا مبستغلش حد
محررة العربيه: تمام
الشيخ: على قد البخور والحاجة اللى هشتغل بيها وهنعملها شوفي إنتى عايزه إيه والوقت اللي تكوني جاهزة فيه وأنا معاكي وقت ما تكوني جاهزة
محررة العربية: أنا جاهزة من بكرة بس الفكرة كل مشكلتي إن أسيوط بعيدة عليا جدًا يعنى ممكن مثلا لو هتنزل القاهرة أقابلك في أي حتة في القاهرة ولو عايز أحولك الفلوس مفيش مشكلة
الشيخ: مفيش غير ثمن البخور والحاجة اللي هشتغل بيها جاهزة بكرة ارسلي لي بكره جاهزة بعده ارسلي لي بعده
محررة العربية: لا بكره معاك مفيش مشكلة نتفق على موضوع حاليًا يعنى موضوع بتاعها ده اللى هو النزيف
الشيخ: حلو الكلام موضوع النزيف عشان تبقي عارفه هنحتاج بخور ذو ريحة كريهة
محررة العربية: أنا اللى هجيب الحاجة دي ولا حضرتك
الشيخ: أنا مش هتصرفيلي الفلوس عشان أنا أجيبهم
محررة العربية: تمام
الشيخ: وهنحتاج دبابيس وهنحتاج عنبر كبد الحوت التلاتة دول
محررة العربية: دي الحاجة اللي حضرتك هتجيبها
الشيخ: دى الحاجه اللي أنا هجيبها
محررة العربية: دي الحاجات اللي هي ليها
الشيخ: دى الحاجات اللي هي ليها للأذى
محررة العربية: طب الحاجات بقى اللى هتجيبها لي ولا أنا أبعتلك الفلوس وأنت تتصرف
الشيخ: أنا هجيب اللي أنا عايزه ومفيش مشكلة
محررة العربية: تمام أنا معاك مفيش مشكلة.. طيب سمعت صحابي قالولي لي على حاجة اسمها سحر سفلي قالوا لى بيتعمل على الظهر ومعرفش إيه لو عملتى معرفش إيه على ظهره هاااا يبقي حاجات كده فأنا مش عارفه الكلام ده هبل ولا ده حقيقى ولا ايه
الشيخ: مابيبقاش كده مع احترامي ليكي بيبقى السحر السفلي ده بيبقى على جنابة إنك إنتي تبقى تكونى جايبة الشهوة بتاعتك وتكتبي بيها حاجات معينة في منها للمحبة ودى بتجيبي الشهوه بتاعتك وبتسقيه منه وتاني حاجه دي بتتعمل على التعب والأذى والكلام دوه ده برضو بيتكتب لمؤاخذة طلسم على الصدر وطلسم بيتكتب لمؤاخذة في الكلمه تحت البطن بشوية
محررة العربية: تمام....طيب أنا مع حضرتك قولي التكاليف
الشيخ: ياست الكل بالنسبة لي للأذى ليها وبالنسبة لده ألفين جنيه
محررة العربية: يعنى ده ألفين وده ألفين ولا الاتنين ألفين
الشيخ: لا ده الفين وده ألف
محررة العربية: يعنى كده تلاتة
الشيخ: كده تلاتة
محررة العربية: ماشى هحولك على الرقم ده ولا على أنهى رقم
الشيخ: أنا هديكى رقم فودافون كاش وتحولى عليه بكره عايزه كمان تحولى يوم الحد على البريد اديكى الاسم ورقم البطاقة وتحولى عليهم اللى انتى عيزاه أنا تحت أمرك في عايزه كمان تشرفيني تيجي أسيوط عندى فوق دماغي من فوق برضه
محررة العربية: خلاص أنا هخد منك أي حاجه مفيش مشاكل بس متهيألى بتاع البريد ده أسرع عشان لو معرفتش أنزل من البيت في موضوع فودافون ده
الشيخ: موضوع فودافون أسرع..أحسن من البريد فودافون كاش بتروحي أي فرع فودافون عندك وتحولى من عليه
من جانبها، تطالب "العربية نيوز" الأجهزة الامنية التحقيق فى الواقعة، لاسيما امتلاك تسجيلات صوتية للمحادثة التي تمت مع الدجالين، إلى جانب سرعة ضبط المتهمين، كما تطالب قطاع مباحث الإنترنت بتتبع الصفحات التي يستخدمها الدجالون وإغلاقها.
