نجلة سامي العدل تنشر رسائله في ذكرى وفاته: "وحشني الطفل اللي جواك"
كشفت رشا سامي العدل نجلة الفنان الراحل سامي العدل، في زكرى رحيله عن مجموعة من الرسائل المتبادلة بينهم قبل رحيله.
ونعت رشا والدها من خلال صفحتها الرسمية على موقع التواصل الاجتماعي "فيس بوك" قائلة: "وحشتنى رسايلك ليا لما كنت بغيب عنك أو أسافر وحشنى هزارنا مع بعض ودلعنا لبعض وكمان لمى كنا نناقر في بعض ونغلس على بعض".
وأضافت: وحشنى لما كنت بعاملك على انك ابنى واخدك في حضنى وحشنى حضنك ولمسة إيدك على كتفي وانت بتضمنى ليك وتحسسنى بأمان وأن الدنيا بخير وحشتنى ملامحك ووحشنى الطفل اللى جواك وحشنى زعيقك وشخطك فينا وحشنى صوتك اللى كنت لما اسمعه من تليفزيون وانا في أى مكان اتخض وابص ورايا وحشتنى ضحكتك ونكتك وحشنى حسك اللى كان مالى عليا دنيتي.
وتابعت: "ما قدرتش اتفرج على مسلسلات رمضان السنة دى ولا أجى جمب التلفزيون، أصل انت ماكنتش فيهم وانا اتعودت يا نتفرج سوا يا تكلمنى تسألنى رأيى واتعودت اول يوم ومضان وكل عزومه فيه نتفرج كلنا معاك لما بيكون ميعاد عرض مسلسل ليك بعد الفطار، ممكن الناس تنساك او تتناساك بس أنا عمرى ما هاقدر انسي روحى اللى سبب حياتي دلوقتى".
واستطردت: "كان نفسي تكون معايا دلوقتى وتشوف ولادك وأحفادك هاتكون فخور بيهم اوى كل واحد من بعدك قرر يغير اسلوب حياته ويثبت ان اللى خلف ما راح...يا رب تكون بتنعم بالجنة وشايفنا ومبسوط بينا".
واستكملت: "زى النهاردة وبالتحديد في الوقت ده تقريبًا خبر وفاتك زعل ناس كتير وانا الوحيدة اللى كنت معاك 7 ساعات متواصلة دموعى بتنزل لوحدها وأنا ببوسك واقرأ قرآن وصوتى محبوس وكنت حاسة انى بموت معاك زى دلوقتى احساسي صعب وانا بكتب الكلام ده بين دموع وألم كأنى بعيش الساعات من أول وجديد".
وأنهت كلامها قائلة: "ما حدش هايفهم أنا كنت عاملة إزاى ولا حضر حالتى غير أول ناس شوفتها في أول الـ 7 ساعات دولNancy Zohney اللى أغم عليها وشلوها بره وRola Asseir اللى ماستحملتش 3 دقايق على بعض وخرجت ومش هانسى موقفهم أبدًا... وحشتنى اوى.
واختتمت منشورها بقرأة سورة الفاتحة على روح والدها.
