ننشر تفاصيل الخطة الذهبية لإسعاد زوجتك في العيد
تداول عدد من النشطاء على مواقع التواصل الاجتماعي تفاصيل الخطة الذهبية لإسعاد زوجتك في العيد، وذلك بمناسبة حلول عيد الفطر المبارك.
1-اصحى الصبح قبل منها وحضر لها المشروب اللي بتحبه شاي أو قهوة.
2- خد دوا القولون وكل من الكحك أو البيتفور الي هي عاملاه.
3- قلها إنه حلو جدًا وأحسن من السنة الي فاتت وإنك بقيتي أستاذة حلويات يا حبيبتي.
4-استغفر ربنا ع الكدبة دي في سرك.
5- لو في نوع شارينه من برا غريبة او بيتي فور أو مامتك أو أختك لا قدر الله بعتهولك مثلا كل منه وقلها مش حلو خالص كحك انتي أحلى بكتير.
6-استغفر ربنا في سرك.
7-أما بقى لو حماتك إلى بعتتلكم كحك أو بيتفور قولها طنط طول عمرها بتقدملي حاجات حلوة كفاية أنها ادتني احلى بسكوتة في الدنيا الي هو أنتي يا قمري. ولما تروحوا تعيدوا على حماتك كرر البقين دول قدام حماتك.
8 - بص مش هينفع تستغفر ع الحتة إلى فاتت دي أنصحك احجز عمرة على طول وربنا غفور رحيم.
9-اديها عيدية!! هتقولك هو أنا صغيرة قلها أنتي في نظري على طول صغيرة.
اشكر في لبسها وقلها إنها حلوة وشيك وأحلى من جميلة عوض ويسرا اللوزي.
10-استغفر ربنا تاني في سرك.
11-زعق في العيال لما يلخبطوا البيت المترتب والنضيف وقلهم ماما تعبانة في التنضيف بس لازم يكون قدامها هتفرح جدا.
12-خد بالك الشيطان رجع تاني وهو الي بيقول تسال ليه البيت ميبقاش نضيف كده طول السنة. أوعى تسأل.
استعيذ بالله من الشيطان الرجيم لإن الإجابة معروفة أنت وعيالك السبب.
13- لو هتخرجوا تتغدوا أو تتعشوا بره خليها هي تختار المطعم وسيبها تطلب اللي نفسها فيه.
14-لو روحت أثناء إجازة العيد تشتري أي حاجة من السوبر ماركت هاتلها معاك شيكولاتة أو أيس كريم هتفرح قوي.
15- اضحك في وشها واتفرج معاها على التيلفزيون بدل ما كل واحد ماسك تليفونه أو آي باد!
16- استخدم برفانك الجديد اللي هي بتحبه وأنت واخد رأيها فيه.
17-لو شربت شاي أو قهوة اغسل المج أو الفنجان بعد مع تخلص ورجعه مكانه واعملها معاك مشروب حتى لو هتفتحلها كان بيبيسي هتفرح بالحركتين الأونطة دول.
18- حاول مترميش هدومك ع السرير وعلقهم ع الشماعة ولو مقتدرش لا يكلف الله نفسا إلا وسعها.
19-لو مجبتش هدية قلها أنا كنت عايز أجيلك هدية بمناسبة العيد بس اكتشفت أن كل يوم معاكي عيد جديد وانتي اكبر وأجمل هدية أنا أخدتها في حياتي.
20-استغفر ربنا جامد قوي المرة دي.
21- حاول متبخلش عليها يعني العيدية بدل 50 خليها 100 "اسمه العلمي سيلدنافيل" أصل انت في رمضان كنت وحش اوي .. مانا فاهم الصيام السبب كلنا بنقول كده.
22- لما ترجع شغلك بعد العيد أبعتلها رسالة ع الواتس آب أو الفيس بوك قلها وحشتيني جدًا يا ريت الإجازة ما خلصت.
وأنت راجع من الشغل بقى لازم تعدي على حد أهل ثقة من رجال الدين يكون متعاون ومش متشدد يحاول يشوفلك طريقة ممكن تتوب بيها بعد الكذب ده كله.
