محمد عطية يدافع عن هشام جمال بعد إعلان "ارسم قلب"
عبر المطرب محمد عطية عن غضبه بسبب الهجوم والتجريح الذى تعرض له المطرب والمنتج هشام جمال بعد ظهوره بإعلان "ارسم قلب" لصالح مؤسسة دكتور مجدى يعقوب، عبر حسابه الشخصى على موقع التواصل الاجتماعي "فيس بوك".
وكتب فى تدوينة "صباح الخير يا جماعة.. (هشام جمال) الشاب اللي طالع فى إعلان دكتور مجدي يعقوب.. أولا أنا لا أعرفه ولا عمري شفته قبل كده وما عرفتش اسمه غير النهاردة لما لقيت التايم لاين كله بيتريق عليه ليه يا جماعة التجريح ؟؟ ليه الإهانة والهجوم بالمنظر ده ؟؟
وأضاف "لو مش عاجبك أي شيء ممكن تقول عادي ممكن تقول صوته وحش لبسه وحش قول اللي إنت عاوزه ده ذوقك وإنت حر بس ليه محاولات التحطيم المعنوي بالمنظر الفج ده أنا بتكلم عشان أنا ليا تجارب كتير فى الموضوع ده خصوصا بعد احتكاكي بالسياسة".
وتابع "أنا خلاص اتعودت ولو ماكنتش مختار موقفي السياسي ده بمزاجي وعارف عواقبه كنت ممكن أتدمر نفسيا.. أرجوكم بالراحة علي الواد علي فكرة البوست مش القصد منه التحكم في أسلوب حد أو الحجر علي رأي حد أنا ماعنديش مشكلة في اي حاجة البوست رجاء مش أكتر التجريح جزء من اللي حاجات الي بيتعرض ليها اي حد بيكون مشهور بس أنا عاوزكم تحطوا نفسكم مكانه الشاب لسه بيقول يا هادي.. الرحمة يا جماعة برة بيقفوا جنب أنصاف المواهب لحد مايعملوا منهم نجوم وإحنا بنبقي قاعدين مستنين الغلط لأي حد عشان نحطمه الرفق يا بشر".
شارك عدد من نجوم الفن والرياضة فى إعلان تطوعى لصالح مؤسسة مجدى يعقوب لعلاج القلب فى شكل أغنية بعنوان "ارسم قلب".
شارك في هذا الإعلان "ارسم قلب" الفنان محمد حماقي، والنجمة دنيا سمير غانم، والفنانة القديرة إسعاد يونس، والنجم الكروي القدير محمود الخطيب، والنجمة نيللي كريم، والعديد من نجوم الكرة منهم النجم حازم إمام، الكابتن حسام غالي، رمضان صبحي، حجازي، وقد شارك أيضا العديد من نجوم مسرح مصر، وكتب هذا الأوبريت الغنائي الفنان أمير طعيمة.
