بالصور.. جريمة بـ"البدلة الميري".. "الجيش الإلكتروني": سيدة تفضح أمين شرطة يبيع ضميره.. "حاتم" يسهل لمتهم بيع المواد المخدرة داخل الحجز.. وقاعدة "الأتوبيس" تكشف المستور

عرض الرائد خالد أبو بكر، قائد الجيش المصري الإلكتروني، صورًا لأمين شرطة أثناء ترحيله لأحد المتهمين داخل أتوبيس.

وظهر في الصور المتهم وقد تم فك الكلابشات من يديه ويطلع بصحبة أمين الشرطة على أوراق قضيته الموجودة بصحبة أمين الشرطة.

وكتب الرائد خالد أبو بكر عبر صفحته الشخصية بموقع التواصل الاجتماعي "فيس بوك": "النهارده الصبح سيدة فاضلة ركبت الأتوبيس ففوجئت بأمين شرطة محترم راكب مع متهم من قسم النزهة.. شويه والمتهم طلع فلوس من جيبه اداهم للأمين.. الأمين طبعا فك له الكلابشات وقعدوا مع بعض يتكلموا ويوريله الأوراق بتاعه الترحيل ونماذج الحبس والقرارات وطبعا ده ممنوع.. الست رمت ودنها وعرفت إن الشخص ده متهم بالاتجار في الهيروين وكان معاه فرد خرطوش وطلقتين، شويه والمتهم طلع من بنطلونة شرايط ترامادول واداهم للأمين علشان يشيلهمله لغاية ما يخلص العرض علي النيابة، لأنه داخل حجز المحكمة وطبعا هيتفتش فمش عاوز حد يمسك الحاجات دي معاه ويرجع يديهاله تاني علشان يبيعهم للمتهمين اللي جوه حجز المحكمة وطبعًا مش ببلاش أكيد كل ده بمقابل".

وأضاف "أبوبكر" في تدوينته: "السيدة المحترمة سجلتلة فيديو وصورت كل حاجة من مبدأ أن الرقابة لازم تكون من الشعب وعلشان نرصد أي شيء غلط طبعا علشان محدش يرجع يتأذى أو المتهمين تهرب أو أي شيء لا قدر الله.. السؤال هنا: إزاي متهم زي ده يترحل في أتوبيس عادي وإزاي يتفكله الكلبش وإزاي يشوف نماذج الحبس بتاعته وطبعا إزاي يكون معاه شرايط المخدرات وحاجات تانيه كتير.. احترامي لكل الشرفاء في البلد دي اللي مش بيشوفوا الغلط ويسكتوا.. واحترامي للأمناء الشهداء والمحترمين وهم كتير".