مخرج فيلم اشتباك: "كان نفسي أفرح الناس"
عبر المخرج محمد دياب مخرج فيلم "اشتباك" المشارك في مهرجان كان السينمائي، عن حزنه من عدم حصول الفيلم على أية جوائز.
وقال دياب من خلال صفحته الرسمية على موقع التواصل الاجتماعي "فيس بوك": "جوائز مهرجان كان أعلنت والسبب الوحيد اللي مخليني زعلان إن فيلم اشتباك مخدش جايزة إن كان نفسي الناس تلاقي حاجة تفرحها وسط الغم وان كل شاب محبط يحس إنه يقدر يوصل لأي حلم حلمه".
وأضاف: "الأيام اللي فاتت حسيت إني محمد صلاح لعيب الكوره اللي بقي مصدر السعاده الوحيد وهو بينجح وبيرفع رأس مصر بين أهم أنديه العالم".
وتابع: "مع كل خبر عن الاستقبال الإيجابي للفيلم أو عن اختيار النقاد ليه من أهم 10 أفلام في المهرجان، أو اختياره من الخمسة أفلام المدعومة من رابطة السينمات المستقلة في فرنسا كنت بشوف الناس بتفرح كأنه جون لمصر في كأس العالم".
واستطرد: "الحاجة الحلوة إن اللخبطة اللي عايشنها في مصر بتتحول لمصدر إلهام فني لجيل جديد. معنديش شك إن كل مهرجانات العالم واي تظاهرة فنية هنشوف فيها فنانين مصريين هيخترعوا طرق متخيلنهاش عشان يعبروا عن نفسهم.. كنت هتضايق لو كنت حاسس إن وجودنا هنا صدفه ومش هيتكرر، بس ده اجتهاد وتعب وعرق وتفكير وأكيد مكلل بتوفيق ربنا.. عشان كده متأكد إن لينا جولات تانية كتير".
وأوضح: "يمكن تكون رحلة مهرجان كان انتهت، بس رحلة اشتباك لسه بادئة في كل مهرجانات العالم ولو الدعم اللي شايفة منكوا أتوجه لقاعات السينما في مصر، ساعتها هنشوف أفلام زي اشتباك وأحلى من فنانين كتير محتاجين دعمكوا."
وقال أيضًا: "أوجه الشكر إلى كل إنسان باركلنا أو دعمنا أو دافع عن الفيلم (خاصة الزملاء الفنانين) وبعتذر إني معرفتش أرد على كل واحد وأشكره بنفسي.. شكرًا ليوسف شاهين ويسري نصرالله وصناع الـ23 فيلم مصري اللي شاركوا قبل كده عشان انتو اللي فتحتولنا الباب هنا، وشكرا لكل الفنانين المصريين اللي مستوي شغلهم تطور في السنين اللي فاتت واللي كانوا مصدر إلهام شخصي".
ولفت: "أهم شكر للي آمنوا بالفيلم وقت ما ناس قالت مستحيل يتعمل وكل شخص اشتغل في الفيلم وعمل إضعاف المجهود.. واللي هيشوف الفيلم ده هيعرف قد إيه اللي اشتركوا فيه بيحبوا بلدهم".
كما أشار: "أما كل واحد حس إن الفيلم بيمثله وكان بيتمنالنا ولمصر الخير وبعتلنا دعوة أو شوية طاقة إيجابية.. ألف ألف شكر".
واختتم كلامة قائلاً: "وزي ما قولت قبل كده احنا كسبنا أهم جايزة وهي احترام العالم".
