الرئيس: بنشترى سلعا أساسية ووقودا بمليارى دولار شهريا.. وحريصون على ضبط الأسواق

قال الرئيس عبدالفتاح السيسي: أنا بشغل 6 ملايين.. قولولى انتو يا مصريين، احنا كلنا في مركب واحد، أخلي ده يقفل ويروح.. حتى لو هديله 500 جنيه أو 1000 جنيه، في حين الراجل اللى شغال في الدولة بيعمل مبلغ أكبر من كده بكتير، وعايش، هتقولى بس الدنيا غالية.. بس كلنا نقدر نعيش.. لو نستحمل هنعيش وهنكبر ونتجاوز المشكلة".

وفيما يخص الدولار، قال الرئيس السيسى: "فيه رؤية طرحتها الحكومة.. شوفوا دايما كان الدولار بيمثل مشكلة كل كام سنة في مصر طيب ليه ؟، الدولة المصرية مش بس الإنفاق اللى عملناه أو الحرب ضد الإرهاب، إنما بقدم خدمات وببيعها بالجنيه واضطر أجيبها بالدولار هديكوا مثال، سلع أساسية بمليار دولار في الشهر قمح ذرة فول صويا طيب بيعه للناس بالجنيه طيب عاوز وقود قد ايه ؟ مليار دولار تاني، شهريا".

تحدث الرئيس عبد الفتاح السيسى عن احتياجات الدولة الدولارية، قائلا: "النهادرة محطات الكهرباء بتاخد غاز يسوى تقريبا مليار دولار شهريا.. 3 مليارات دولار مش أقدر مش أوفرهم لأنها حاجات أساسية.. أنا مش داخل فى نقاش.. بحاول أشرح لكم حجم التحدى اللى عايشنه حتى من قبل 2011.. الأرقام دى إذا مكنتش الدولة المصرية يعملوا على زيادة موارد الدولار وتكون أكثر أو تساوى انفاقنا.. إللى بيجلنا من بيع منتجات أو التصدير أو قناة السويس أو السياحة.. لو مش حققنا المعادلة دى هتكون المشكلة دى.. هى دى الحكاية كلها اللى عاملة".

قال الرئيس عبد الفتاح السيسي، إن الحكومة يجب أن تضبط الأسواق، متابعا: "حد يقولي الحكومة والدولة تضبط الموقف في الأسواق.. صحيح وطبعا.. لكم حق وده كلام بقولوا لنفسي قبل الحكومة والداخلية.. اللى بنتكلم عليهم مواطنين مصريين.. لما أكون مواطن بكسب كويس أوى وعندى تجارة كبيرة أتصور إن المكسب المناسب يبقي كفاية مش هقوله ضحى.. ده كلام مش بالخواطر بتمشى الدول.. الدول بتمشى بالسياسات والقوانين والعمل.