ورا مصنع الكراسي.. الحلقة الثالثة "الاحتراق الذاتي أو ظاهرة الـ SHC"

ورا مصنع الكراسي .. جملة هانقف عندها كتير 
كل واحد فينا هايخده خياله لبعيد، بس ياترى هيوصله لحد فين .. مش عارفين .. لكن الأكيد أن ورا مصنع الكراسي مليان حواديت وقصص كتير مختلفة .. ياترى كام واحد فينا عنده الشجاعة يروح ورا مصنع كراسي .. ويا ترى هيلاقي ايه وهيرجع من هناك زي ماهو ولا حد تاني .
طيب ماتيجوا نروح ونشوف مستنينا ايه ....ورا مصنع الكراسي ..... 
 

الاحتراق الذاتي أو ظاهرة الـ SHC
 

كتير منا سمعوا أو يمكن قرأوا عنها في كتاب أو على الانترنت ومافهمش ايه هي أو اعتبرها خيال علمي أو شطحات علمية زي حاجات كتير بتعدي علينا .

لكن الحقيقة ان خلال ٣٠٠ سنة مرت كان فيه اكتر من ٢٥٠ حالة احتراق ذاتي أو حالات وفاة لأشخاص مالهاش اي تفسير علمي أو منطقي !!!!!

ياترى مريت بتجربة زي دي او سمعت من حد قريب منك عنها !!!!

طب تخيل معايا كده تكون واقف أو يحصل قدام عينيك لحد تعرفه تلاقيه فجأة وبدون اي سبب واضح خارج منه دخان وفي ثواني أو دقايق قليلة يختفي ومايتبقاش منه غير شوية رماد وانت واقف في حالة ذهول من اللي حصل !!!!!
 

طب ماتيجوا نسمع  حكاية جديدة من حكايات ورا مصنع الكراسي..

غرام كانت اصغر طبيبة في الطب الشرعي وكانت من الشغوفين جدا بالخوارق والأمور اللي مالهاش تفسير علمي واضح، وكان ليها دايما منطق غريب اكيد فاتهم حاجة مفيش ظاهرة مالهاش تفسير .. وكأن القدر كان مرتب أنه يجاوب عليها بشكل عملي جدا جدا ..

انتشرت الفترة الاخيرة مجموعة حوادث غريبة مالهاش تفسير أشخاص بتتحرق ومابيتبقاش منهم غير كومة رماد او على احسن ظروف رجل ...ايد ...جمجمة ....ومفيش اي سبب واضح هما اتحرقوا ازاي وليه ولا في اي اثر للنار حواليهم هما بس ايوة هما بس اللي بيتحرقوا وكل حاجة حواليهم سليمة !!!!!!

في الحالات دي من القضايا غالبًا بتتقفل وتتصنف أنها خوارق أو مالهاش تفسير علمي !!!!!
النهاردة  حفلة خطوبة ندا وشريف أصحاب غرام وكانت الخطوبة عائلية جدا وللمقربين بس وفي عز الفرحة وعلى انغام الموسيقى  وشريف وندا  بيرقصوا وبدون أي مبررات أو أسباب دخان ازرق خارج من دراع ندا !!!!! ايوه دخان والكل اللي حواليهم مذهولين ومش فاهمين ايه اللي بيحصل ومنين وسط صراخ ندا من الالم ....انتوا فاهمين بتتحرق اه بتتحرق !!!! 
 

وفجأة غرام جريت جابت تلج حطته على ايد ندا وبقت كمان تحطوا في بوقها وتصرخ ابلعيه ابلعيه !!!!! ولستر ربنا سيطرت غرام على النار اللي خرجت من دراع ندا لكن هاتفضل علاماتها سايبة اثر مش مفهوم ومن غير سبب !!!  طب ايه اللي حصل ماحدش عارف ؟؟؟ والنار مصدرها ايه ؟؟؟؟ مفيش !!! طب وازاي كم فستان ندا مفيهوش اي اثر للنار اللي حرقت دراعها ؟؟؟ الحقيقة مفيش اجابة وده زي حوادث كتير بنفس الطريقة مالهاش تفسير يمكن ندا من القليلين اوي المحظوظين اللي نجوا أو طلعوا بأقل الخساير من ظاهرة الاحتراق الذاتي !!!!!
 

الحقيقة انا لو منكم اخاف ...ياترى كام واحد ممكن يختفي ويسيب وراه مجرد حفنة رماد  .. مستغربين ولا خايفين ولا مش مصدقين .. بصراحة ليكم حق ....بس ليه لأ .....بس هو من أمتى ورا مصنع الكراسي ليه منطق أو عقل ...
 

ياترى ممكن نكون منهم  ... والدور علينا بس مش عارفين .....يمكن ....أو يمكن يكون حصل حواليك او سمعت عنه ....كام قضية اتقفلت من غير اجابة  ....إنه الاحتراق الذاتي !!!!