ورا مصنع الكراسي.. الحلقة الثانية "المستبصرون"

ورا مصنع الكراسي ...
جملة هانقف عندها كتييييير 
كل واحد فينا هايخده خياله لبعيد 
بس ياترى هايوصله لحد فين .... مش عارفين ... لكن الأكيد أن ورا مصنع الكراسي مليان حواديت وقصص كتيييير مختلفة ... ياترى كام واحد فينا عنده الشجاعة يروح ورا مصنع كراسي وياترى هايلاقي ايه وهايرجع من هناك زي ماهو ولا حد تاني ...
طيب ماتيجوا نروح ونشوف مستنينا ايه .... ورا مصنع الكراسي ..... 

هو فعلا في حد يقدر يشوف بكره او يعرفه !!!!!

طب ياترى لو بيحصل تفتكروا ايه السبب ؟؟؟؟

وياتري دي حاجه طبيعيه يعني منحه أو هبه من عند ربنا لناس بعينها ولا ليها سبب تاني حادثه ...صادمه ...يعني ولا الاتنين في بعض !!!!! 

وتفتكروا ممكن نلاقي تفسير علمي الموضوع ده ولا دي مجرد قدرات شخصية لبعض الأشخاص ؟؟؟؟، يعني اكيد كلنا سمعنا عن علم الفراسة وكمان لغة الجسد وغيرها ايه اللي يمنع أن ماتبقاش مجرد هبة أو صفة مايمكن شطارة وعلم ....

طب ماتيجوا احيلكم واسيبكم تحكموا واطلعلكم حكاية جديدة من ورا مصنع الكراسي .....
البداية حريق في المعمل ونار من كل اتجاه وأحمد صوته مش طالع ومش عارف يتصرف ازاي والدخان بيزيد ويشوش على كل حاجة مخه وعينيه وفثواني احمد غاب عن الوعي تماما وماحدش عارف ايه اللي حصل جوه لكن إرادة ربنا أنه يخرج ويعيش بس ياترى احمد رجع زي ماهو ولا فيه حاجه اتغيرت ؟؟؟؟؟ 

من يوم ما اتكتبله عمر جديد وحياته اتشقلبت رأسا على عقب كل يوم يصحي بحلم جديد بس مش مجرد حلم ده واقع هايحصل أو بيحصل فعلا !!!

واتحولت حياته تماما بقى شايف وعارف اغلب اللي بيحصل حواليه ومابقاش عارف طب يقول ولا يفضل ساكت !!! هايصدقوا ولا هايصعب عليهم ويقولوا معلش الحادثه اثرت علي عقله !!!! 

الحيرة والاستغراب بقوا صحابه قفل على نفسه لحد قبل وفاة والده بشهور ايوه كان بيحلم ويشوف إشارات عن ده لكن عقله رفض أنه يصدق أو يربطها بوالده ونقدر نقول إن دي نقطة التحول الثانية في حياته بعدها اخد قرار أنه مش هايفرق معاه يتقال عليه مجنون لكن مش هايسكت يمكن يكون هو الفرصة الاخيرة لشخص تاني ....

ياترى حوالينا كام مستبصر خايف يقول عشان مايتهمش بالجنون أو انه كداب !!!! 

مستغربين ....مش مصدقين .... بصراحة ليكم حق ....بس ليه لا .....هو من أمتى ورا مصنع الكراسي ليه منطق أو عقل ...

ياترى انت منهم ....طب شايف بكره .....واتغيرت ولا زي ما انت  

دور حواليك احنا كتييييير ويمكن تكون واحد منا .....المستبصرون !!!!