مين السبب؟
لم يكن ظهورها إشاعة كما كنا نتصور.. ولكن لأول مرة منذ وقت بعيد يتحدث وزير عن ظاهرة ما مثلما تحدث وزير الرى عن وجود تماسيح فى ترع الهرم وفيصل وكنا نظنه واهمًا ولكنه يصدق ولأول مرة فى كلامه بعدما سمعنا منه خبر البئر المكتشف فى الصحراء والذى سيغطى احتياجاتنا من المياه، كما أعلن لمدة مائة عام قادمة.. فها نحن نرى التماسيح فعلا ولكن فى ترعة الإسماعيلية وتم اصطياد أحد التماسيح بطول 50 سم.
نعم عزيزى المواطن تمساح بطول 50 سم فقط لاغير ماتستغربش ومتتعجبش فى ناس بتصطاد ولا تتعبش.. هو دا التمساح ياسيادة الوزير اللى هينيم الناس وهيرعبهم.. هى دى التماسيح اللى هتخوفنا دا سحلية أو برص وكبر شوية.. أحب أقول لحضرتك أحنا مش بنخاف من التماسيح.. أحنا فى انتظار التنين المجنح اللى بيطلع من عينيه وودانه نار.. إحنا فى انتظار الديناصور اللى بيطير وعاوزين نعيش فى عصر جوراسك بارك بقى وجو الرعب دا.. إحنا زهقنا وعاوزين نغير ونجدد بقى.. بس أهم حاجة بقى بلاش حجة أن الأخوان هم اللى رموا التماسيح فى النيل وهم السبب فى ظهور التنين.. عاوزين تجديد!!.
هذا عن التماسيح فماذا عن الأسماك النافقة التى خرجت بالأطنان فى البحيرة وكفر الشيخ ؟؟ انتحرت الأسماك وألقت بنفسها على ضفاف النهر ولما لا وهى ترى التلوث يحيط بها من كل مكان.. وبدل من إيجاد حل للمشكلة أو البحث فى أسبابها وجدنا كل الجهات تكيل الاتهامات جزافا وتلقيها على كاهل جهة أخرى.. البيئة بتقول إن وزارة المصانع هى السبب بإلقاء المخلفات وعوادم المصانع فى النهر.
ووزراة الصناعة بتقول إن وزارة الكهرباء السبب وذلك لوجود أعمدة إنارة بالقرب من النيل، وممكن تكون هى السبب فى كهربة المياة مما أدى إلى نفوق الأسماك.. ثم كان الحل والخلاصة.. أحد المسئولين خرج بتصريح قال فيه أن الأخوان هم اللى بيموتوا السمك.. لا، والتصريح الأجمل كان تصريح أحد المسئولين اللى قال أن المواطنين بيشتروا تماسيح وبيرموها فى النيل.. شوفتوا الحل بسيط وسهل إزاى وكل مشكلة عن الحكومة وليها حل.. بدون اجتهاد ولا بحث ولا فحص ولا تمحيص.. الحل جاهز وسريع وسحرى.. الإخوان هم الحل.. أو فلوس المواطنين الكتير هى اللى بتخليهم يرموا فلوسهم فى النيل!!.
