أقوى تصريحات السيسي من سوهاج.. تحدث عن مبلغ فلكي

قال الرئيس عبد الفتاح السيسي، إن الدولة المصرية تحتاج إلى 70 تريليون جنيه وليس 7 تريليونات جنيه استثمارات لتنفيذ مشروعات لخدمة الناس.

تصريحات السيسي من سوهاج

أضاف الرئيس السيسي خلال افتتاحه عددا من المشروعات التنموية في محافظة سوهاج، فى إطار استراتيجية تنمية الصعيد: "اللي إحنا بنعمله في سوهاج أكثر من 100 مليار جنيه، ولكن اللي اتعمل تشغيله بكام؟ يعني عملت مكتب بريد.. الناس اللي هتشتغل فيه هتاخد كام؟ وهيتعمله صيانة بكام؟ ولو عملت مدرسة علشان تحافظ عليها هتصرف كام؟ وكذلك لو عملت مستشفى هتشتغل كل يوم بكام؟ وكل شهر وكل سنة؟ انت داخل في سباق.. مثلا عدد الفصول الموجود دلوقتي أقل من المطلوب بمنتهى البساطة، يبقى انت الأول عايز تسد الفجوة فجوة الموجود مع المفروض يكون موجود".

وأكمل السيسي: "نحن في حاجة لـ60 ألف فصل بالمدارس سنويا، ولو النهارده عايز أعمل 60 ألف فصل يعني عايز 60 مليار جنيه، ثم أضع معهم مصاريف المدرسة والطقم الإداري والإشراف في المدرسة يعني بكام؟ أنا كنت براجع أمس مع الإسكان علشان أعمل 200 ألف وحدة تانيين.. لقيت الوحدة معدية عليا الـ700 ألف جنيه.. يعني ال200 ألف بـ140 مليار جنيه".

وقال السيسي: "سبب المشكلة لا فساد حكومة ولا نظام إداري ولا تهميش، أنا أعرف يعني إيه قرش ويعني إيه دولة، ولازم نكون فاهمين إننا لو مستمرين بالطريقة دي كل الجهد اللي هيتعمل مش كفاية".

وأردف الرئيس عبدالفتاح السيسي، إنه يتابع "السوشيال ميديا" جيدا وتعليقات كل الناس، واحد مثلا يقول يعني يا كامل يا وزير مش كفاية أسفلت بقى!! ده أول حاجة تتعمل هي الأسفلت.. شبكة الطرق علشان نوصلكم وتوصلولنا.. يا عيني الناس اللى بتقول كده عايشة في مناطق ما شفتش أهالينا في كل حتة في مصر عايشين إزاى وبيمشوا إزاى؟ والبنية الأساسية اللى عندهم أخبارها إيه".

وتابع الرئيس السيسي: "كنا بنقول عندنا صرف صحي لكن نسبته قد إيه 10 أو 13%.. أول ما بدأت سألت: طيب اللى قبل مننا ما كنتش عندهم حلم يعملوا 100%.. لأ عندهم.. بقول كده علشان أبدا أبدا تفكروا كويس جدا قبل ما تطلعوا الكلمة من لسانكم.. لأن الكلمة هنتاسحب عليها قدام الناس والتاريخ وقبل كده ربنا.. كل كلمة محسوبة بدقة.. خلى بالك ما تقبلش الكلمة لأنني أنا شاطر قوى وأنا اللى بعمل.. اللى قبل مننا كانوا عاوزين يعملوا بس مقدروش يعملوا.. كنت بتحلموا كان نفسكم آه طيب منفذتوش ليه؟ مفيش".

وألقى الرئيس عبد الفتاح السيسي، كلمة في ختام جولته بمحافظة سوهاج لافتتاح عددا من المشروعات القومية والتنموية، قال فيها: "كل سنة وانتو طيبين جميعا.. وإن شاء الله سنة سعيدة وطيبة علينا كلنا بأمر الله سبحانه وتعالى".

أضاف الرئيس السيسي، في كلمته: "إنه لمن حسن الطالع ومن دواعي سروري أن أستهل زيارتي الميدانية في مطلع عامنا الجديد 2023 بزيارة محافظة سوهاج، قلب صعيد مصر الطيب، أرض الخير والأصالة وبلد الحكمة التي عرفت أرضها الحضارة منذ آلاف السينين حين شرع أجدادنا في عمارة الأرض وبنائها، ولا أخفى عليكم بالغ سعادتي بوجودي وسط أهل سوهاج بصفة خاصة وأهل الصعيد بصفة عامة، ولا سيما وهم أهل الكرم والطيبة والشهامة".

أكمل الرئيس، قائلا: "أود أن أغتنم هذه الفرصة الطيبة كي أتوجه بتحية تقدير واعتزاز لجموع الشعب المصري العظيم، ذلك الشعب الأبي الكريم الذي يثبت كل يوم أن جذوره الراسخة في أرض التاريخ تلهمه ثبات الخطوات نحو المستقبل بإرادة صلبة وعزيمة راسخة، أهلنا الكرام في صعيدنا الطيب، إن الفخر قد بلغ بي مبلغه ونحن نشهد اليوم معا، تلك الإنجازات تتحقق والحلم الكبير لوطننا قد بدأت ملامحه تشكل واقعا ملموسا على الأرض، وقد كانت هذه الإنجازات ممتدة جغرافيا ومتكاملة قطاعيا وبتخطيط محكم ومصنوعة بسواعد مصرية قوية وقادرة على إحالة الحكم لحقيقية وصناعة الأمل بالعمل".