الرئيس السيسي يطالب بإجراء حوار مجتمعى حول قانون الأحوال الشخصية الجديد

تحدث الرئيس عبد الفتاح السيسي، عن قانون الأحوال الشخصية الجديدة، قائلا: "لما اتكلمنا عن قانون الأحوال الشخصية قولنا شوية ملامح للقانون.. والنخبة اللى اشتغلت فيه مطمئنين أنهم خدوا كل وجهات النظر، وتم طرحها لأن الناس كانت بتشوف الكلام ده على منصة القضاء على مدى 30 سنة وأكثر".

وأضاف الرئيس السيسي، خلال كلمته في افتتاح مشروعات جديدة في مجمع الصناعات الكيماوية بالجيزة: "لما اتكلمنا عن الملامح الرئيسية ده مش معناه أنكم ما تعملوش حسابكم في الحوار حوله.. لازم تعملوا حوار مجتمعي للقانون.. وزير العدل موجود معانا يكلمنا عن القانون الجديد".

تحدث الرئيس السيسي، عن إنشاء صندوق جديد ضمن قانون الأحوال الشخصية الجديد، قائلا: "قولت النهارده نعمل صندوق.. جاي تتجوز حط مبلغ للصندوق.. ومش كبير أوي.. اللى يقدر على الجواز يقدر يعمل ويشارك في الصندوق.. ولا تعقدوا تتخانقوا على الفرش والتكاليف.. لا ده مبلغ مش كتير.. وأنا كدولة اتفقت مع الدكتور مصطفي مدبولي.. نخط قد ما يجيب الصندوق.. مليار قصاده مليار.. مليارين هنحط مليارين.. تأمين أولادنا في كل شيء.. ده النقاش.. انتوا بتتكلموا عن نسبة طلاق".

وأضاف الرئيس السيسي، خلال كلمته في افتتاح مشروعات جديدة بمجمع الصناعات الكيماوية في الجيزة: "جبنا متخصصين من الجامعة وعلم النفس خلال إعداد مشروع القانون الجديد للأحوال الشخصية".

وداعب الرئيس السيسي وزير العدل: "عملنا المؤتمر الصحفي أهو لقانون الأحوال الشخصية الجديدة للحديث عن ملامحه".

وتابع الرئيس السيسي: "أكدنا على ضرورة أنه ما فيش تجربة شخصية تكون حالة عامة في القانون الجديدة للأحوال الشخصية.. إحنا بنعمل قانون الاستثناء للزواج والطلاق الخلاف أثناء الطلاق.. فيه أسر عندها قدرة تتجاوز الخلاف والأمور ماشية بسلام.. وأنت بتعمل قانون الاستثناء.. والحالة الواحدة اللى بتحصل لازم تتدرس لأنها مش ظاهرة".

تحدث الرئيس عبد الفتاح السيسي، عن توفير الوقت اللازم للزوجين من أجل التفكير في الإنجاب، قائلا: "فيه ناس سمعت مني الكلام ده قبل كده.. قولت فكروا في أول سنتين تلاتة قبل الزواج.. الناس فكرت إنى بهدف لتنظيم النسل.. البنت والولد والشاب الشابة كانوا في بيوت أهاليهم في كنف أسرة.. أب بيشيل ويراعي.. راحوا لبيت تاني وشكل تاني".

وأضاف الرئيس السيسي، خلال كلمته في افتتاح مشروعات قومية جديدة في محافظة الجيزة: "لازم فرصة يعيشوا ويتحملوا مسار الحياة لسنة ولا اتنين.. لو بقوا قادرين يدخلوا في مرحلة الإنجاب.. اللى بقوله كلام موضوعي ومنطقي.. لا اقصد أن الناس مش تخلف".

أكد الرئيس عبد الفتاح السيسي، على ضرورة إجراء الكشف الطبي للمتزوجين وفق قانون الأحوال الشخصية الجديد، قائلا: "من إجراءات الكشف الطبي سلامة العقد.. سلامة الشاب قدام سلامة الشابة.. المصداقية والشفافية.. سلامة العقد.. يبقي كدولة قصرت لو ما حافظتش على سلامة القعد".

وأضاف الرئيس السيسي، خلال كلمته في افتتاح مشروعات قومية جديدة بمحافظة الجيزة: "ده مش منظور أخر ومش طبي أو علشان الإعاقة أو عدم الإنجاب ده نقاش عميق جدا ومحاولة مننا أننا نتواجد ونضع حلول وطرحها بنفس العمق .. مش ناخدها كشف طبي بالطريقة دي.. الدكتور خالد عبد الغفار وزير الصحة.. واتفقنا على شروط الكشف الطبي.. وهنعمل لجنة برئاسة قاضي وتروحلها النتائج مميكنة عن طريق وزارة الصحة إلى القاضي ده لتصريح سلامة التحاليل".