حقيقة تعدي مرتضى منصور على مقدم برنامج "السوبر"
كشف أحمد درويش رئيس تحرير برنامج "السوبر" والذي يقدمه الإعلامي إبراهيم فايق على قناة سي بي سي، حقيقة تعدي وضرب مرتضى منصور رئيس نادي الزمالك، لفايق داخل مدينة الإنتاج الإعلامي.
وقال درويش، إن ليلة أمس كانت آخر حلقة للزميل العزيز إبراهيم فايق وفريق العمل في برنامج السوبر على قناة سي بي سي، لأنه سيقوم بتقديم برنامج على قناة دي إم سي.
وأضاف، قائلًا: "المهم لظروف خاصة بالقناة تم تسجيل الحلقة بدري ساعتين مع كابتن رمضان السيد وبعد ما خلصنا وكل واحد رايح يركب عربيته أو مع واحد صاحبه".
وأكمل "لقينا مرتضى منصور واقف قدام القناة ووراه عربيتين فيهم وحيد ابن أخته وناس بلطجية وسأل حد واقف قدام القناة على إبراهيم فايق وعرف أنه مشي من شوية لأن الحلقة كانت مسجلة".
وتابع "فجأة مرتضى بدأ يتحرك بص لقاني واقف مع أحمد الهواري مراسلنا الصحفي في الزمالك وزميلنا عمرو حسن قام نادى على الهواري وشتمه بصوت عالي جدا كذا مرة وقال.. هو فين يا هواري وشتم الهواري".
واستكمل، قائلًا: "المهم اتجمع عدد كبير فوق 30 واحد من معدين وإنتاج وأمن وإخراج cbc وسي بي سي إكسترا وبدأوا في التحرك نحو عربيات مرتضى اللي مجرد ما شافوا الناس جروا زي الفراخ خصوصا أنهم كانوا واقفين على منزل بين صدى البلد وسي بي سي.
وأكد رئيس تحرير برنامج السوبر، قائلًا: "دي كل الحكاية علشان شايف ناس كاتبة إن مرتضى ضرب وناس كاتبة مرتضى انضرب وكلام فاضي.. مرتضى جعجع ولما اتكشمله جاب العربية على سرعة 200 ولا شوماخر بطل السيارات".
المهم إن "مرتضى خاف يجي لوحده وجاب وبلطجية علشان خاف والمهم أن هو كان عارف وهو في المحور إن إبراهيم فايق مشي بس صمم يجي علشان يعمل نمرة فكسانة والله على ما أقول شهيد وربنا يكرمنا بمقطع فيديو إن شاء الله لهروب ضاضا".
