رد ناري من نجل مرتضى منصور على تربحه من النادي
نفى نجل رئيس الزمالك أمير مرتضى منصور، ما تردد بشأن امتلاكه لشركة تسويق وتربحه من وراء صفقات الزمالك.
وقال أمير مرتضى منصور عبر حسابه الرسمي على فيس بوك: "في خبر انتشر في الفترة الأخيرة أنني أسست شركة تسويق رياضي لإدارة الصفقات في نادي الزمالك مع كابتن إسماعيل يوسف ومع شريف إسلام مدير التعاقدات الجديد بنادي الزمالك لذلك لزم التوضيح".
1- لا توجد أي شركات باسمي سواء في لمجال التسويق الرياضي أو في أي مجال تاني ربنا خلقه ده غير إن القانون بيمنع أصلًا أن يكون في أي علاقة تجارية بين أي مسئول وأي حد من قرايبه للدرجة الأولى.
2- اللي وراء الخبر ده موظف في النادي ومسئول سابق وكام سمسار لاعيبة مضايقهم أن أمير بيضيع عليهم عمولات وبيوفروا للنادي ملايين اللاعب والمدرب أصبح الزمالك بيتعاقد معاه بأجره الحقيقي من غير أي عمولات وده سبب أني بسافر كل حتة علشان اتفاوض بنفسي لأن لو النادي فوض سمسار هيكون مصلحته إن قيمة العقد تكبر علشان يستفيد".
3- الغرض من الخبر ده هو إبعادي عن النادي بشكل عام، والصفقات بشكل خاص واللعب على عقلية رئيس النادي "والدي" اللي أول ما هيقرا خبر زي ده هيبطل يكلفني بأي ملف يخص النادي وهيقولي ابعد أنت يا أمير إحنا مش مستفيدين حاجة غير الشتيمة والأخبار الكاذبة دي وبالتالي يغلوا أسعار اللاعيبة عالنادي والمصالح تشتغل".
4-اللي يفرق معايا هو جمهور الزمالك انا ولا بشتغل علشان اتصيت اعلاميًا ولا علشان طمعان في مركز في النادي ولازم الجمهور يعرف مين اللي بيحب النادي بجد ومين اللي بيهجص.
5- أنا لو ربنا كان كاتبلي إني أكمل في الكرة والعب في الزمالك أقسم بالله كنت لعبت ببلاش طول عمري مش إني أعمل شركة واستفيد من النادي".
6- واضح إن السكوت والاختفاء بيدي فرصة لناس فاسدين أنها تخطط وتفكر.. عالعموم أن الفترة الجاية مش هسكت وهفضح أي حد بيحاول يأذي النادي وعلى فكرة أنا مش بتاع #انتخابات أنا اصلًا بتاع #مدرجات وأي حاجة كويسة عملتها للنادي متجيش 1٪ من اللي عندي لكن أنا بحترم نفسي وبحاول أساعد من بعيد.. قريب هتكلم علشان الناس تفهم مين اللي بيحب الكيان ومين اللي بيتشعبط فيه لمصالح شخصية".
